H. Ulvi Fejzullahu
Falënderimi i plotë i takon Allahut, Zotit të botëve. Atë e falënderojmë, prej Tij ndihmë dhe falje kërkojmë, tek Ai strehohemi nga të këqijat e vetes dhe nga veprat tona të liga. Atë që Allahu e udhëzon, askush nuk mund ta humbasë, dhe atë që Ai e lë në humbje, askush nuk mund ta udhëzojë.
Dëshmoj se nuk ka të adhuruar tjetër me të drejtë përveç Allahut, Një dhe i pashoq, dhe dëshmoj se Muhamedi ﷺ është rob dhe i Dërguar i Tij.
Vëllezër besimtarë!
Sot dua të ndaj me ju disa fjalë të rëndësishme, të cilat na ofrojnë shpresë dhe qetësi në udhëtimin tonë. A keni menduar ndonjëherë se si një çast i vetëm mund të ndryshojë gjithë jetën tonë? Besoj se po, sepse ne jemi dëshmitarë të mrekullive të Zotit. Allahu i Lartësuar na thotë në Kuran thotë: وَأَنَّهُ هُوَ أَغْنَى وَأَقْنَى
“Dhe se Ai është që pasuron dhe mjafton.” (Enexhm: 48) Pra, është Allahu Ai që ua lehtëson robërve çështjet e jetës dhe të dynjasë së tyre: tregtinë, punën, rizkun. Ai bën që zemrat të jenë të kënaqura dhe të mjaftuara me atë që Ai dhuron. Çdo mirësi është prej Tij, dhe kjo e bën të detyrueshme që ne të jemi falënderues dhe të përulur para Tij, duke e adhuruar Atë si Një dhe të pashoq.
O besimtarë!
Dije se jeta mund të ndryshojë në një çast.
Mos e gjyko gjendjen tënde vetëm nga ajo që sheh sot. Zoti yt, që e nxori Jusufin alejhi selam nga thellësia e pusit dhe e ngriti në fronin e Egjiptit, është i aftë ta ndryshojë edhe jetën tënde në një çast të vetëm.
Muhamedi ﷺ ka thënë:
“واعـلم أن الـنصر مـع الـصبر، وأن الـفرج مـع الـكرب، وأن مـع العسـر يسرًا.”
“Dije se fitorja vjen me durim, se çlirimi vjen me vështirësinë, dhe se me çdo vështirësi vjen edhe lehtësimi.” (Transmeton Tirmidhiu, dhe e ka saktësuar shejh Albani)
Kjo është një prej rregullave të jetës dhe një prej ligjeve të Allahut mbi krijesat: pas çdo errësire vjen drita, pas çdo vështirësie vjen lehtësimi. Mendo pak, o besimtarë/e:
• Në një çast, toka e thatë u bë kopsht me një shi të bekuar.
• Në një çast, u hapën dyert e qiellit për shkak të një lutjeje të përulur.
• Në një çast, një njeri i thjeshtë u ngrit me sabrin e tij nga errësira në dritë.
Atëherë, mos e nënvlerëso lutjen tënde.
Mos u dëshpëro nga pritja e gjatë. Sepse Zoti i çelësave nuk harron askënd që troket me sinqeritet në derën e Tij.
Le të lutemi bashkërisht:
O Allah, vetëm Ti që pasuron e mjafton, që jep e ndalon, që larton e ul, të lutemi, na bëj të besojmë se vetëm Ti je Zot i ndryshimit, i përmirësimit dhe i rregullimit.
O Allah, ashtu si e zbukurove tokën e thatë me shiun e mëshirës, zbukuro edhe jetën tonë me mirësinë dhe faljen Tënde.
O Allah, ashtu si hape dyert e qiellit për lutjet e robit të përulur, hape edhe për ne dyert e shpëtimit dhe të mëshirës.
O Allah, ashtu si e ngrite robin nga errësira në dritë me sabrin e tij, ngri edhe ne nga sprovat tona në dritën e sigurisë dhe të qetësisë.
O Allah, mos e lër të dobët lutjen tonë, sepse vetëm Ti ndryshon çdo gjë me një urdhër Tëndin.
O Allah, na jep durim dhe qëndrueshmëri, na jep besim të pastër dhe mendim të mirë për Ty.
O Allah, na dhuro më shumë se sa shpresojmë, sepse kush mendon mirë për Ty, Ti e shpërblen përtej dëshirave.
